كلمات اغنية البحث عن زاكرة وطن مفقود عقد الجلاد
عَبيّت زُوادتي الرّيقة من بايت القَوَى
الوطن الدّشَرْ
غيمو الرّبَطْ
ساعة بقينا من الرّوَى
شبّة مطرْ
سافرت لِكْ بأشواقي لآخر المنافي
بَحّتَّ في كل المخافي
وكُسْتَ عَنِّك في الخُرَطْ
في التواريخ الرؤومة
بين نقوش نبتة ورسوما
في الطّرابيل العظيمة
وبين لُغة مروي القديمة
وخَطْ في خَطْ
راجعتَ بِكْ كل الاسامي البعرِفا
كل الُّجمل حتى الضمائر وأحرُفا
صحّحتَ بِكْ زمني الغلطْ
باخَتّبِكْ قلبي الشّقِى
وبشرتو بي لُقْياك عَبَطْ
يا طيبة زي شارع وَسَطْ
يمشيبو كادِح وارزقي
وممتنعة زي قبض المياه
والمافي
والما بتلقي
غالِبني جيتك أصادفا
لا في المعابر والموانيء المُترفة
لا في المطارات الوسيمة كما الفراغ
لا الأرصفة
كل الدّروب التّعرفيها وبعرِفا
التألفيها وبألفا
خَشّيت دغيش سِعْن الدِّني المرفوع على سِيبات وفا
رَوّابي كان قُطّاع غني
وشوقاً مَفورِنْ وانكفى
قِدّام خُطى الوجد الِحفى
غابت صباحات القُرُب
وبَقّت ضلامات الجفا
و ضَي المصابيح الجريح
كِترْت علي الرّيح وانطفا
هوي يا بِنيّة من الغُبُش
من حَرْ أباطهم مُترفة
وين انتي شان نرقد قَفَا
وين انتي وين في يات دُغُشْ
ما بيننا بين غيبتك كفى
لو بَقّ حِسِّك في هشيم دبش الضياعات والسأمْ
زي أغنية شوق
زي نشيد
اندبَّى همسِك زي نغمْ
او خبّ خطوِك زي شهيد
رَفّتْ مسيرِتِك زي عَلَمْ
ما كان مهابات الصِّقور
نخّت تحت رخّة رَخَمْ
وين انتي وين
ما كان هجم ديش العجم
والدِّنيا ضَوْ
وامسن سبايا الاغنيات
العُزّل ألآه شِنْ تسوْ
ولافي الكفوف الخاوية سيف
لا في الكتوف الزاوية ضَوْ
دَلّجتَ درب الاربعين
صاقَرْ قوافل الرِّق سنينْ
برّاً
وبحراً
حتى جَوْ
أشريكِ قُلْتَ من الزمنْ
واعتق معاك رِقّة مشاعري ازوِّجك كل الوطنْ
كل الرِّجال الحملو ارضك بالحلال
وافتق سحاب العشق شَوْ
ولا بنتي في الزِّنج البَجَمْ
لا كنتي في العرب الأشوْ
لافي شلوخا
ولا الوشم
لا في شيوخا ولا في عَوْ
بل فيكِ غشّاني الزمن
ادّاني صَرْصَرْ وبعتو نَوْ
كوترني بي حبل الوَخَمْ
كُلْ ما انقطع توْ باَنْ لي توْ
ناقِزْ وراكْ
ناقِزْ وراكْ
ناقِزْ وراكْ
انترْتَعَتْ رُؤياي
هَكَعْ
ما بين أريت يا ام زين ولوْ
وبين تبقي وين
لاكْ في الوجود
لا في العدمْ
لا في الحقيقة ولا الوهمْ
لا زين
لا شين
لا البين بين
يا راحة الباقالو هَمْ
لا عنِّك أفتاني الزّمان
لا مِنّك إنقطع العشمْ
يا ريتو أغناني الكَمَانْ
آ طيبة عن صوتِك نغمْ
من أعلى ميضنة فيّي كان أعلنتَ موتِك للأُممْ
أو صِحْ بجيتك لى الرِّمَمْ
لكنو صمتك طال
وحَانْ ميعاد زفافي على الألم
قلت ارفع ايديني واقول
خاني الصبر
خان وانهزمْ
زي ما انهزم كمّين نبي
وخانت على التاريخ ذِممْ
آ طيبة أخافك واللاّ اخاف
السُّبة واللّعنة الوبيلة
تحل وراي كما الجفاف
أو تار على اكتاف قبيلة
معلمي اللّــــه من عتاد
يبرِدْ حشاها ولا في حيلة
بَلا تأمِّل في البُعَاد سنين سنين ودنين طويلة
وكيف وكمْ
والإنأخد بالدّم غَصِبْ
مافي البرجِّعو إلاّ دَمْ
آ طيبة هيلة
سلام
عوافي
يا أصيلة كما المَعَانا
أو بديلة عن اللِّي مافي
يَمّه أدخلي على غُنانا
يا أمُرقي من القوافي
يا أحذرينا وما تخافي
وما بنخيّب حاشا ظنِّك
ينفخوها وما بتموتْ
حيّة نارِك حيّة يوتْ
خُتِّي قِدْرِك في الأثافي
يوسف الفي الُّجب بيمرُق
ضاربا ريقة اليلقى قوتْ
روقي أكنِّكْ
واللاّ كَنِّك
تاوقي في البحر الخرافي
يونِسِك في ياتو حوتْ
سَمّ ينده جوفو حافي
وهِّطينا على الأثافي
وهِّبي نارك لا نموتْ
يا حمامة غار محمّد
يا خيوط العنكبوتْ
يمة كُسناك ضُمّة مافي
الدّروب وين غيّبنِكْ
في سؤالنا الضّارِي عَنِّك
سَدّن ابوابِن بيوتْ
والبيوت البشبهنِّك
انكرننا وانكرنِّك
ننكشف لا لوم عليهن
بس ها كيفن يسْتُرنِّك
وفي سُكاتنا الجاري مِنِّك
رحّبنْ بينا السجون
الدرادر والمنافي
فينا مَنْ روّح فدايتك
وفينا من لا زال
وفينا
مافي من بدّل لرايتِك
وانتي في ذات السكوتْ
التراب يتشهّى حِنّكْ
السِّحاب عابر يفوتْ
واللاّ يكمُد للعيون
بالغُبار غُمّة وسوافي
وانتي يا آخر المرافيء
يا امْ وجوداً بات خرافي
في صحاريك داخ غفاريك
من برِد زمنو الرِّعافي
دون كواريك
مات واتاريك
غبتي بي كل المدافيء
يا لساريك لاك موافي
لا كمان قادرين نسيبِك نمشي في الزمن المجافي
ما عهدناك عاد تخافي
كانفعالات المُراهِقْ
شابكة كالشّجَر الضِّفافي
خيلِكْ - الرِّيح - حين تنهّدْ
لوحة التاريخ بيشهدْ
لونا والدّم الإضافي
إلاّ يا وتري وغُناهو
راحة أنغامو وعَنَاهُو
يا نبي الثورة الغشاهو
برداً أكتر من غُتَاهو
الاّ يا بِتْ جاك زمن دارِعْ الأيام قُلُبْ
الدفاتر والكتبْ
إستحمّتْ بالغُلُبْ
التلاميذ النُّجُبْ
طيّشا الفقُر
الغبينة
صنّت الأجراس وجينا
إلاّ يا آخ ما لقينا
الجوامع مستباحة
والمصلّين صَرْ جُنُب
الكنائس جالبا دينا
والمدينة تبيع عوينا
لي النخاسية الغُرُبْ
لي اللُّحاسية وعُقُبْ
تشتري آفات الرُّعُبْ
والهتافات الجُرُبْ
عربدت باسم السّما
توّكت ريح السُّحُب
ومن ضُروعاً كان تكُبْ
كل أطفال الفقارى
وكلهُنْ في فَدْ شُخُب
في اللُّغة الجرسية سُبْ
في التُّقى النجسية سُبْ
في الوقار الفاوه سُبْ
في شعار ما ساوى سُبْ
واللاّ اريت ما كُنّا منك
لا في بيناتنا القُرُبْ
كُنّا اقلاّ نشوفو عادي
التردِّي الجاي وغادي
سادي في النعم الزيادي
وابن آدم بالأيادي
لى سُترة الحال يكافِت
غابة غابة
ووادي وادي
ينبح المسكين يا طيبة
طيبة يا راحة الفتارى
وواحة الفي الصّيْ حيارى
عورة الشُّرفاء الفقارى
سُترتها ولُب المباديء
يا بنية الأُجّر ام خير
أو نبية الشجر الطير
يا رسول البسمة للاطفال حبيبة نيل بلادي
يا طليقة الغيم عروس طين البوادي
المناديل بانتظارِك والايادي
معبّا شوق
يا طيبة
طيبة
طيبــــــة
ولا حياة لمن تنادي
بَكاك بكيتني سَكَتْ برايا
كنت حافي على إبر
بِتّ حابي على شظايا
من انكسار رمّاشْ عيونِكْ
فوق مسام سام المرايا
من كُتُر تعباً تعبتو
قلت ألقاك ما كَفَاية
يا تكمِّلي فيّي صمتِكْ
يا أخلِّص بيك غُنايا
دي الحنايا وراكِ يبستْ
وامست آشميق الخلايا
وبِتّ أمسِّرْ من حروفِكْ
وأفتل الأيام قراية
نبّقْ الغيم برضو إرضِكْ
ما استجابت لي سُقايا
وقُلتَ اخطِّكْ بي دمايا
يا اصابعيني ابقي ريشة
ويا شراييني الدواية
وقنِّعي الرِّيح الورايا
النّكعْ بالخيل
محالاً
يدِّي بي بَقَر الدّرَايا
انتهت كل الخفايا
وقلت اكوسلِك في الخطايا
لمّا في ذات لُقيا حَرّ
وزاد هواكي على هوايا
وقمتي خنتيني معايا
اشتكيتِك لى القمرْ
وضُمّتْ انسام السِّحرْ
الرياحين والزهرْ
شهدوا ليّ عليك يا اخيّة
جاء القمر سوّاك بريّة
وباعتزاز بى نبرة حيّة
صاح في جمعنا يا بريّة
من يكن من غير خطيّة
وقُمْ رميتِك بالتحية من اللِّي فيّ
فيا وفيّة
يا معاكي تغيبينا
يا تعالي وابقي جية
للبعيشو غَصِب عشانِك
والبموتو بحسن نية
حَارْ علينا بعد طراوة
وبين عيون احباب تقيّة
نبقى في كتمة وشقاوة
وبين أرَاذِل
وارزقيــة
كفاك شكية
كفاك شكية
يا التّشرِّكْ لي غمامك
وتحتَك الانهار قوية
ما انسرق ذات ليل سنامَك
لو قبيل كُسْتَ الحوية
كفاك شكية
وما بيضيع حق لا قضية
لو في طُلاّب من وراهو
ونية بيضاء وبندقيــة
كلمات اغنية زانقوا ماني لريري عقد الجلاد
زانقوا ماني لريري
رونا ســــــــــاره
زانـــــقوا ســـاره
مالنــــجيا سيسـي
ايي منفو كــــــــــو
ســـــــاره ليـوسي
اي را من فوكـــــــو
ساره ليـــــــوسي
الطمباره والغناى
للشاعر/ محمد طه القدال
لحن الاستاذ/عثمان النو
نحن اهل الفرحه جينا
لاالمدامع وقفتنا ولاالحكايات الحزينه
لما درب الرايحه جابنا جابنا في هادى المدينه
ياولدى الدروب شقاقا بحر التيه
ليك درب ولا دربين مساك الدروب ضهاب
ليك قلب ولا بالين وسواى القلوب كضاب
ليك ضهر ولاسرجين ركاب السروج وقاع
شق ياولدى بحر التيه بتتدردر وتتودر
ولامن يوم علي تايتنا ديك ترسي
نعزك بالقبيل داخرنو ليك
الشوق بحر ياولدى بحراً تيه
قت ليك العليك ادرابو لا تنغش ولا ترضابو لاتنغش
في الزمن الزمين والكي يسوهو خلاف عشان الني
عليك الدور وتصريف الليالي بدور تشيل ما شلنا من الهم
ولا من دمعه ترمي الدمعه فوق دربك
روح يابا .. وابق قفاك لاتعاين ولاتعاين علي موطاك
ولا تندم علي خطوا تملي مشيتو لى قدام
وابقي العاتي زى سنطتنا زى صبرا نلوك فوق مرو زى الزاد
لاشيتاً نزل في الجوف ولابرجع ولا بنزاد
واركز للبجيبها الريح تقيف انت ويشيلها الريح
وابقي العاتي والدرب الوراك مسدود و شيل شيلتك
بقيت للنص لاحلما بجيب البر ولا حدود
وانبليتا اختا الرمله ما تقع البكان الهش
هي الممطوره مابتبالي من الرش
النعمه بتعرف عاطيها والجمره بتحرق واطيها
بالكيله عطانا و ما لقينا فوق جمر خطانا وما لقينا
يوم الوعد... ياحليوه فيك الدنيا ما كانت شروق
الا الارض متكشفه متبلمه نعمنو من خير الخريف
لافحالها شال منطرحه خضرا وفرحه دوب تتشابي لي عين الشمس
من بت حليوه النفس بيضا كذا الحليب
والروح مشحتفه في البلود الفيها ريحتك
للبعود من فزعة الغربة البساسق فوكا
موراجع ولا بالحيل قريب
الروح مشحتفه في الحبيب القلب بكر الدنيا ما شافت جديدو
ولا الحزن دقالو باب
وشفتي كيف يوم الوعد كيفنو مترامي الغمام
والقمري زغرد للبلوم النسمه هبت مرتين
يا حليوه يوم دقيت بارضك فاس خصيب والتانيه في
يوم الوعد والايد تسالم في الايدين
والام تقالد فوق جناها تشمو زين
وحليوه صاحيه حليوة ضاحيه كذا النسيم
والدنيا غيم وحليوة جد جد ياولد قول للبلد
قايل غناوي الحزن ليش شايل مساديرك مجامر دمع ليش
ليش يا بلد والناس تريد والدنيا كل ما نريد تزيد
تملا الايدين تفرح تهش
لو صحيح غنينا بالدمعه الحميمه ولو دموع الفرحه ما لاقت غنانا
بكره نرجع تاني للكلمه الرحيمه شان هنانا شان منانا
شان عيون اطفالنا ما تضوق الهزيمه
لانك عندى كل الخير
وجيهك فرحة الدنيا
ودواخلك زى شعاع النور
عرفتك وكنت زى شفتك
قبل القاك
وزى انك بتنبعي من فرح جواى
تمسحي عن رؤاى الضيم
وتضحكي للزمان الجاى
وتتفجر مسامك ضي
مع الصبح الغشانا شوى
كأني معاك كائن حي
كأنو صفاك كأنو الحل
افارقك والعمر عندك
زهيراتاً غشاها الطل
واحاسيسك بتتكمل
غنيواتك بتتبارك مع
الايام وتتجمل
افارقك والزمان اجمل عشان
تشعل ملامحي ضياك كل مانجيمه
تتحول
وشان تفضل ملامحك فيّ زى ماكنتي في الاول
حاجة آمنة
حاجة آمنة أصبرى
عارف الوجع فى الجوف شديد
عارفك كمان ما بتقدرى
اصبرى .. اصبرى
جاهلك شكى وجاهلك بكى
وفى بيتك المرق اتكى
والشيء البحير ومابحير
مابيه يا حاجة الزكاة ...
طلع الصباح لو ليك مراد
يا حاجة ما تطلع شمس
والليلة عندك زى أمس
لسه الرويدى مع الصباح
من مدة ماجاب ليك خبر
كان جوفو زى جوف العيال
من مدة داير ليه حجر
والله على الزمن الحجر
المابى بالصبر اتكرى
سرحتى فى هموم العيال
كيفن يعملوا مع الدروس
وسرحتى فى حق الفطور
باقى الامور البى القروش
واحد زمن داير ردا
واحد خلاص قلموا اتكسر
زى التقول أكلوا الصبر
يا حاجة آمنة اصبرى
مشيتى لى برج الحمام
برجك صفحتين ما بزيد
ومشيتى لى برج الحمام
كان تلقى ليك جوزاً جديد
يمكن بعد طلع الصباح
يغشاكى زولاً يشترى
هبشتى جاى فتشتى جاى
كان تلقى سكر بس محال
باقى الرطيل الفى الكرت
يا حاجة سفوهوا العيال
يا حليل زمان وسنين زمان
يا حاجة لو تذكرى ... يمه
وسمعتى صوت جاك من بعيد
وبعد قليل بابك ضرب
وسمعتى صوت جاك من بعيد
شالك تعب ... ختاك تعب
يا حاجة ناس المويه جوك
أصلو الشهر روح جرى
يا حاجة آمنة اصبرى
بعد صراع وصراع طويل
يا حاجة بينك والمحال
ما لقيتى فى داك النهار
شيتاً ويجو ياكلوا العيال
حبة عدس ما بسوى شيئ
وينو البصل وينو اللحم
حبة عجين ما بسوى شيئ
وينو الدقيق وينو الفحم
من جاى لجاى
هبشتى جاى فتشتى جاى
كان تلقى شيئ
لازمك كتير شان تقدرى
لازمك كتير اتقدرى
يا ودود الابتسامة
بشتكيلك منك الحزن الدفين
خلي بالك للغمامة تملئ
تملئ لما تنزل لا بتشكي ولا بتحكي
الا تطلع من انين الارض وردة وعش حمامة
شفتك امبارح معايا
كنت بين نايمة وصاحية
تحتويني الريدة والشوق والعنا
وانت صاحي ترفع ايدك للشموس العالية
وتدفئ الغنا
ينتميلك قلبي يا اب قلباً حنين
بشتكيلك منك الحزن الدفين
كل مانقول خلصنا الليل
يطلع باكر ليلا أطول
كل مانقول خلصنا الشيل
تطلع شيلة باكر أتقل
بس نتحمل ونصبر ونأمل
إنو الجاي صباحا أجمل
لكن كيف
طعم الريد جوانا اتحول
مرة تشيلك فوق لفوق
مرات تملاك فاقة وضيق
تلقى الدنيا تلم في هموما
تفتح جرحك وانت تضوق
أنسى وأقول ما منها مني
دايما بحلم وأنا ممحوق
قنا كتير الشارع بقصر
لمن نصبر نحن نكون
لم الزول في يوم يتعثر
بكرة القاسى الشافة يقول
بكرة بنمشي الخطوة الأولى
التانية التالتة
الرابعة الخامسة
وفجأة
نلقى الشارع قسى واتحجر
نلقى الحلم الفينا اتكسر
ويبقى الزول
مسجو ن مجنون مهضوم بالهم
مسكون ميئوس معفوص جواو
منحوس محبوس ويكوس
أسي دا شارع ماشي لي وين
لينا عليهو سنين وسنين
نمشي كأننا ما ماشين
نفتح سكة نسد اتني
ايدينا ياولد ايدينا للبلد
الغربه ان شاء الله تعقري ياتعدمي المال الفقري يا تعدمي
الشيك الخضري والله شلتي العيال من بدري والله شلتي
ايدينا ياولد ايدينا للبلد
كان اخويا اللبره جانا والله يصلح الحال معانا والله يصلح الحال معانا شلنا الغربه المئخرانا شلنا الغربه
ايدينا ياولد ايدينا للبلد
ننتج بي ايدينا والله نخلص العلينا شان تشيل ام ريكا دينا نبني دارناوتبقه لينا نبني دارنا
اخلاصنافي العمل ا خلاصنا في العمل يسوقنا للامل
حكومه كان تنصلحي كات تعرفي عيشي وملحي كان تشوفي
اللبي تزحي ماتباري القول تلحي كان تعرفي
كان الحكوم صلح سودانا صار مليح
ايدينا ياولد ايدينا للبلد
المدينة
للشاعر/ هاشم صديق
الحان / عثمان النو
دي المدينة وديل ايديا
داير اكتب انا في النوافز اه في المنافز
اسمي تاريخي وحكاوي الرحلة في الزمن المعاصر
داير اقول كل الكلام
الما اتفهم لي جاري
لي صاحبي واخويا
ولا اتشرح جوه الدفاتر
داير اقول همسي الصريح
وقصه الحزن المحكر جوه فيني
في دروب الدنيا متغرب مسافر
دي المدينة وديل ايديا
اه اه يايمه لسه بخوض في بحر الزيف
رمل الصحرا غمر بستاني طال الصيف
ومازارني خريف طال يايمه
لسه بخوض في بحر الزيف
مشيت في الشوك لي ضريحك ابكي
مره اكابد ومره اعاني
مره اقيف اتنفس لحظه
واعود من تاني اخوض في الزيف
اه اه يايمه لسه بخوض في بحر الزيف
اشعار : احمد محمد الغالي
الحان : عثمان النو
عيناك لي سقيا وحلاوة اللقيا
إن غابت الاصحاب وتركتو مقهوراً
عاراً بلا انخاب اتلصصو السقيا من فارغ الاكواب
عيناك عيناك
قلبي عليك يمور ياقارب البلور
من لحنك المكسور ياقارب البلور
قلبي عليك يمور ياقارب البلور
الكف صار عليل عليل يا قارب البلور
قلبي عليك يمور ياقارب البلور
لايرسم اللوحات ولا يحمل الازميل
قلبي عليك يمور يا قارب البلور
ان غابت الاصحاب وتركتو مقهوراً
عار اً بلا انخاب اتلصصو السقيا من فارغ الاكواب
عيناك عيناك
موضوع: كلمات اغاني فرقة عقدالجلاد 
الخميس يناير 31, 2013 4:13 pm
