منتدي ابناء جدو
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


ملــــــتقي أبناء جــــدو بنيالا
 
الرئيسيةأحدث الصورالتسجيلدخول

 

 كلمات اغاني فرقة عقد الجلاد

اذهب الى الأسفل 
كاتب الموضوعرسالة
ابوالسمؤال
Admin
ابوالسمؤال


المساهمات : 53
تاريخ التسجيل : 24/01/2013
العمر : 34
الموقع : مدير عــــام

كلمات اغاني فرقة عقد الجلاد Empty
مُساهمةموضوع: كلمات اغاني فرقة عقد الجلاد   كلمات اغاني فرقة عقد الجلاد Icon_minitime1الخميس يناير 31, 2013 4:15 pm

كلمات اغنية الاهليه عقد الجلاد

سم الله ابتديت متل البرق لاحت
فى الشين والفسل بقينا نتباحت
طال الكان قصير والعالى اتاحت
والصولات حليلن ملكتن راحت

مالك يا زمان شبعتنا هولا
لبست الناس تيابا حاشا مى هولا
يات من كان يجي دماعو مبهوله
ولله راحت بقت البواجهولا

مالك يا زمان شبعتنا وح ووحيح
صح الدون كضب
كضب العوالى صحيح
يات من كان انا جعلتو لى صليح
عقرب حزّه لى ويا نفسي زين ومليح

فى احوال الزمن صار الفكر حاير
والياباك خلو عندو شن داير
فوق اهل الفكر كاس الوحيح داير
نفد سوق النفاق سوق السمح باير

تب الشباب ان بقا كواس
تب الصبى ان قطع المروة خلاص
تب الشايب ان بقى وسواس
تب الاقربين الاتفاتتو الامغاص

كلمات اغنية شين ودشن السيافي الشين عقد الجلاد
شين ودشن
حر سيافى شين
شين ودشن
كلمة مافى شين
وهظاروا خشن
بسموم وسوافى
تسال شن الحبة الفيهو
الحب في زاتو مبرر كافي
ماشين ودشن
حار سيافى شين
عشان بقعة خراب
مافيها شجر
راويها سراب واطاطا حجر
حصحاصا يولع في الرمضاء
الحب سلطان مسلط نافى
لغيروا مرض لكن شافي
الشعب الحر الفعلو بسر
آب لحما مر
في الزنقة أم لوم قدام ميلين
البسمع فيهم يا أبو مروة
بي فرارة ينط من جوة
يبادر ليك من غير تأخير
دا اخو الواقفة يتعشى الضيف
الحافظ ديمة حقوق الغير
سيد الماعون السالي السيف
الهدمو مترب وقلبو نظيف
لا تسالنى عن حب وطني الفقران وغنى



كلمات اغنية مشاوير المحبه عقد الجلاد
يا مشاوير المحبة
الكلمة تقلت
والخطيــــــــوات الندية
الغيمة الشالت...دمعة مرة
غــــــــرَ قت أناتا أرواحنا الوفية
الصدق أصبح في عيون الناس مظنة
الصدق أصبح فينا كلمات هامشية
والحقيقة بقت مخافة وانزوت في عمق أعماقنا الخفية

يا مشاوير ضيعيني
جدِدي الذاد للمشاوير الشقية
توهي النور و بدِديهو
خلي إظلامك يغيب
كل لحظة فرحة فيا
تبكي إحساسي الحنـيِــــــــن
فتِريـني و دردِريـــني
وأصلي ليك أنا ماني هيِــــــن
كل نهاية تكون بداية
كل وجعة تفرهد الإحساس جوايا
وابقى عايش للعُوينات الوفية
وابقى عايش عمري للصادقيـــن هدية


كلمات اغنية نوره عقد الجلاد

هيْ .. أقيفِنْ .. ‏
نورا فِيكِنْ
نورا ... نقّاحة الجِّروفْ .. ‏
نورا ... حَلاّبة اللِّبيني .. ‏
للصغيرين والضِّيوفْ ‏
نورا ساعة الحَرْ يولِّعْ .. ‏
تنقلِبْ نسمة وتطوفْ ‏
تَدِّي للجيعان لقيمة ‏
وتَدِّي للعطشان جغيمة ‏
والمَخَلِّي الحال مَصَنقِرْ .. ‏
في تَقَاة اللّيل تَندْقِرْ .. ‏
تدِّي لي باكر بسيمة ‏
تَكْسي للماشين عَرَايا ‏
وفوقا ينقطّعْ هديمه ‏
‏ما عِرفتِنْ ... نورا إنْتِنْ .
.قولِنْ إنتن شِنْ عِرفْتِنْ ‏
نورا بِتْ ا***** ‏
أخيتي .. ‏
نورا أخُتْ كُلّ الغلابة ‏
نورا حاحاية الشّقاوة .. ‏
نورا هَدّاية الضّهابة ‏
الأراضي اليَاما أدّتْ .. ‏
نورا ... بقّتْ من تُرابه ‏
وماشي في الأعماق سحابه ‏
مشتهنِّها .. والله جابه ‏
الله جابه ... الله جابه ‏
للجنوب طبلاً‎ ‎‏ يَهَدْهِدْ ‏
ليل مشاعر ناس تعابة ‏
وللشّمال طنبور يَسَكِّتْ .. ‏
دمعة الميتين كآبة ‏
ما عِرِفْتِنْ نورا إنتِنْ ..
قولِنْ إنتن شِنْ عِرِفْتِنْ ‏
نورا
‏ عايزه تقرأ . قالتْ ‏
فوقا حيطة الدِّنيا مَالتْ ‏
خَتّتْ الكرّاس وشَالتْ ‏
منجلاً صَالَتْ بو جَالَتْ ‏
لامِنْ إنجرحت بو شالَتْ ‏
لي التراب فوق إيده كَالَتْ ‏
ومَرّة يوم في الدُّونْكَا لِدْغَتْ ‏
جاء الفقير بالليل حَوَاهَا ‏
ويوم ملاها الهم قطايع .. ‏
جاء البصير بالنّار كَوَاهَا ‏
ونورا . ما قِدْرَتْ تمانع .. ‏
تقنع النّاس المعاها ‏
مرة شافت في رؤاها ... ‏
طيرة ... تاكل في جناها ‏
حيطة تِتمغّى وتفلّعْ .. ‏
في قَفَا الزّول البناها ‏
في جنينة سيدي سِمْعَتْ .. ‏
شتلة تصقع لي الوَرَاها ‏
الأرض .. ‏
‏ لابُدَّ ‏
‏ ترجع ... ‏
للتِّعِب فوقا ورعاها ... ‏
غيمة ... والنِّيل موجو لاها ‏
والعطش شقّقْ شفاها ‏
الشّمس طَبَقت ضُحَاهَا ‏
الخليقة لقت إلاها ‏
نار
عقاب إنسان مكسّر .. ‏
فوق تَلَكِّيات متاهة ‏
وضَوْ من الله .. رهاب مكتّفْ ‏
في وتيد اللّيل معاها ‏
بين ربوع حَضَره وخلاها ‏
فَسّرَتْ لي النّاس رُؤاها ‏
وقالوا .... جَنّت .... ومو براها ‏
ونورا زادت فوق شقاها ‏
‏ ‏و صَدّتْ الأيام .... تحُشْ ‏
تبني لي عصفورة عُشْ ‏
في السّواقي تشوف عزاها ‏
لما شوقه يسوِّي .. أُشْ !!! ‏
تملا ... تزرعْ ‏
ترعى .. تقرع ‏
للنهار في الليل تخُشْ ‏
عِرْفَتْ الشّقَا والشّقَاوة ‏
إلاّ .... ‏
ما عرفت تغُشْ !!! ‏
شايلة طولة البال من الله .. ‏
ومن أراضينا الإثارة ‏
وماشي تكدح طول نهاره ‏
وترجى لما الليل يَفلِّلْ .. ‏
تسرِق ألمي عشان خداره ‏
عشان صغاره .. ‏
عشان خداره ‏
عشان صغاره .. ‏
ولما ترجع لي دياره ‏
تنزف أحلام الفقارى ‏
من عويناته الحيارى ‏
لي غُبار الحال تقُشْ ‏
فوقو لي الآمال ترُشْ ‏
نورا .... ‏
تقعد ‏
‏ صاحيي تحلم .. ‏
بي بيوت بي نور ودُشْ ‏
وبالمحبة تشُق دروبه .. ‏
ولي قلوب الكل تخُشْ ‏
نورا ... ‏
‏ تحلم بي وجود ‏
ما مشت بينو القيود ‏
أفضل أفضل بي الكتير .. ‏
بي وطن من غير حدود ‏
نورا تحلم بي عوالم ‏
زي رؤى الأطفال حوالم ‏
لا درادر .. ‏
لا عساكر .. ‏
لا مظاليم ‏
لا مظالم ‏
نورا تحلم .. ‏
ولما تحلم ..... نورا ترجِفْ ‏
ولما ترجف .... نورا تحلم .. ‏
ولما ريح الواقع المُرْ .. ‏
لي عشيش أحلاما ينسِفْ ‏
نورا ..... تنزِفْ ‏
وفي الوجود .. وجدانه يهتفْ ‏
حالة .. تقرِفْ .. ‏
حالة تكسِفْ .. ‏
حالة تكسِفْ .. ‏
حالة تقرِفْ .. ‏
وتبدا تقضِفْ .. ‏
ولما تقضِفْ ‏
‏ بالا يهتِفْ .. ‏
وتملا باله أحلام بتلصِفْ ‏
يوم حا تنصِفْ ‏
يوم حا تنصِفْ ‏
نورا .. ‏
لسّه بعيد .. ‏
هناكَ .. ‏
وتبدأ تحلم .. ‏
ولما تحلم نورا ترجِفْ ‏
ولما ترجف نورا تحلم ‏
صاحيي تحلم.. ‏
وصَاحْ بتحلَمْ ‏
صاح بتحلَمْ ‏
بتحلم صاحْ


كلمات اغنية اه يا غبش عقد الجلاد
آه يا غُبُشْ
ما عندي ليكم غير نغيم
برجوه ينفُض
لي غبار زمن القسا
الكتّاح
يهِزْ عرجون نخل صبر الغلابة الطالْ
يحِتْ يخرِتْ
تباريح الأسى
الممدودة فوق نور الدُّغُشْ
يا نورا آه
يحرَد كنائسنا المسيح
يعرش مدارسنا الصّدى
ييبس يباس
حلق العصافير الوديعة من البُكَا
يندَرْدَرْ الصّوت البعيدْ
أسيان يصُد من دون صدى
ينكَفْرَنْ الفجر الصّبوح
يحمي الزهيرات الندى
تختا الدراويش الضّريحْ
يسكن خلاوينا الجنون
يهجر جوامعنا الإله
يا نورا آه .
تطرح غيوم الشوق تئِنْ
تشرَقْ
تموت
خيل كلمة الحق التّناهِدْ في الشِّفاه
تعقِر بسيمة الصِّحْ
مع لوبي الجّروفْ
تغرِزْ ضريعات الحروفْ
ينشف مُرَاح الأمسيات
تتمطّق الأرضة المروق والأغنياتْ
اللّي الشّروق
والأرض
والحب والمطر
تضْهَب تتوه
وكتين يضيع عرق الجِّباه الشُّم
شمار في مرقة
آه يا نورا آه .
من دّرْبِكْ التّور نَفَس خيل الصّبُر
فَتّر خطاوي الشّوق وراه
يا نورا آه .
ساعة الشّموس الغُرْ تهضلمْ
تلحق الصِّح في المغاربْ
تدفر الضو الكهاربْ
في وشيّكْ
تذفر المدن
الضّبابية
السّرابية . الكآبة
وحائط التيِّه
والطّشَاشَات
فوق قِفيِّكْ
يا أم عوارض مو دعاشة
ماها شبّورة وتقيفْ
جايي ليك يا نورا غيمة
تملا ماعونك خريفْ
يملأ عينيك ويفضِّلْ
يروي جوّاك . العطاشة
مو دعاشة
.
يا مطر عِزْ الحريقْ
يا مصابيح الطّريقْ
يا المراكبية البتجبِدْ
من فَكْ الموج الغريق
يا الجزاير النتحويبا
لما إنشعوز بحرنا
جينا ليك والشوق دفرنا
يا المراسي النتحويبا
لما إنشعوز بحرنا
يا نشوغ روحنا ودمرنا
يا المحطات الحنينة .
القصّرَت مشوار سفرنا

يا ما شايلك بيني حايمْ
أيوة شايلك بيني حايمْ
في الأرِضْ تكوين قضيّة
في السّمَا الأحمر غمايمْ
بي برِدْ نغما السّلامِي
رَطّبَتْ حلق الحمائمْ
طنبر النّخل التبلدي
راقص الأبنوس وصَفّقْ
سَوّتْ الصقرية موجة
خَلّت النِّيل هاجلو هوجة
بشّرت بالخير بلدنا
شالت الشّبَال نسائمْ
جدّدَتْ زلفي القديم
أمشي بي الماشيبو أقاوم
لا بتكَبِّر راسي فورة
لا بتصغِّرني الهزائمْ
جِنْس يا نورا ابن آدم
حلمو في عالم مسالِمْ


لا اللّيالي الماها ليّا
لا الشّمَاتات العليّ
لا البنوك المخملية
لا تفاهات الحضارة
لا عفاريت المدينة
لا العمارات السّوامِق
فوق ضَهَر ناساً فقارى
لا الهتاف الفاوة ضارى
غطى بالي من الفوارق
لا الألوهة الطوطمية
لا البرندات الوسيمة
ولا الأسامي الأجنبية
بتمحى من عيني ملامحِكْ
وإنتي جاية المغربية
جايي دايخي المغربية
وشِّك المقبول مكَنْدَكْ
سامسونايتك زمزمية
كونشبر
مرزبة
مقطع
ريشة فانوساً مدَرْدَحْ
قلت بيهن لي زمانك
يا زمان الحاجة عندكْ
يا زمان الآفة حدّكْ
لا تطا الوردة الصبية

يا نفس فجر القصائد يا بلادي
القَطَع قلب الرّوادي
باللُّواج الجاي وغادي
ده ما هو صوتِكْ لاها صورتِكْ
دي البترقش
ناديي فوق صدر الجرائد
ماها صورتك
لا هو صوتك
لاها صورتك
إنتي يا الفي إطْن الصّحَارَى
شُفّع العرب الفتارى
البَفِنّو الشايلا إيدُنْ
ويجرو كابسين القطارة
يجرو باريين القطارة
لا سراب الصّحراء موية
لا حُجار سلّوم موائدْ

إنتي في الغابة اليصارِعْ
جوفو للآهات تلكِّي
ياما دفّقْ غيم رجاهو
لكن الأيام كركِّي
في خلا حالنا اليمحِّن
ويملأ بالسُّهد الوسائدْ
إنتي غيمة
شديرة
خيمة
إنتي جاهنا
والتّقَا الطّلَقَت وشينا
فرّقَت غُمّة جباهنا
فرّجت في الحارّة ضيقنا
فرّحَت شُفّع فريقنا
والمواعين الحزينة
وإتجاهنا
يا النغيم البقّ فينا
وشدّ لي وتر إنتباهنا
يا تباشير يا بشارة
إنتي يا ضرعاً تَكَرْمَشْ
شان يرضِّعني الجسارة
إنتي في منفاي رفيقة
وفي حشا الأشواق حرارة
يا هُدَى النّاس الحيارى
يا ندى الفجر اليبلِّلْ
صور عوينات الفقارى
جاي ليك
آه جاي ليك
يا نورا آفة
آفة للسوس الجا ينقُرْ
عود عشيماً داخرو فيكْ
وأصلي لمن أدور أجيك
بجيك
لا بتعجِّزْني المسافة
لا بقيف بيناتنا عارِضْ
لا الظُّروف تمسك في إيدي
ولا من الأيام مخافة
يا نفس فجر القصائد
ما ضِهِبْ في بُعدي عنِّكْ
واصلي متغرِّب عشانك
راضي بالبيجيني منِّكْ

ما بكيت شُحْ اللّيالي
لا شكيت نُحْ شلتو حالي
رغم إنو الحال بيفسَخْ
إلا كُت في الحارة بصرخ
يا وطن عِز الشّدائدْ
يا وطن عِز الشّدائدْ


كلمات اغنية المدينه عقد الجلاد
دي المدينة وديل ايديا
داير اكتب انا في النوافز اه في المنافز
اسمي تاريخي وحكاوي الرحلة في الزمن المعاصر
داير اقول كل الكلام
الما اتفهم لي جاري
لي صاحبي واخويا
ولا اتشرح جوه الدفاتر
داير اقول همسي الصريح
وقصه الحزن المحكر جوه فيني
في دروب الدنيا متغرب مسافر
دي المدينة وديل ايديا

اه اه يايمه لسه بخوض في بحر الزيف
رمل الصحرا غمر بستاني طال الصيف
ومازارني خريف طال يايمه
لسه بخوض في بحر الزيف
مشيت في الشوك لي ضريحك ابكي
مره اكابد ومره اعاني
مره اقيف اتنفس لحظه
واعود من تاني اخوض في الزيف
اه اه يايمه لسه بخوض في بحر الزي


كلمات اغنية ياودود الابتسامه عقد الجلاد
يا ودود الابتسامة
بشتكيلك منك الحزن الدفين
خلي بالك للغمامة تملى
تملى لما تنزل لا بتشكي ولا بتحكي
الا تطلع من انين الارض وردة وعش حمامة
شفتك امبارح معايا
كنت بين نايمة وصاحية
تحتويني الريدة والشوق والعنا
وانت صاحي ترفع ايدك للشموس العالية
وتدفئ الغنا
ينتميلك قلبي يا اب قلباً حنين
بشتكيلك منك الحزن الدفين


كلمات اغنية كنتو وين عقد الجلاد
خوفي من تلحق رفيقك
يا بريق نجم الحيارى
وإنت لا نّور طريقك
لا شرق فجر السهارى
من زمن يا صحوة طلعك
غصة في حلق الصحارى
حتى شال النمة فرعك
دودى زي وهج البشارة
قلنا يا سعد المواسم
عودك المليان جسارة
عودك الفجري المصادم
بالبصيرات والبصارى
مستحيل يرضخ يساوم
مهما كان الريح حصارا
يفضل النخل البقاوم
في السقوط نخل الفقارى
يااندلاع صوت الغفاري
في حلق دغش الغلابا
لو خريفك تاني يطرح
آهـ يا اخر سحابة
لمايا شرف المواكب
يبقى هم الناس إمارة
تندحر كل المناصب
ينكسر كرسي الوزراة
كنتو وين وين إنتو كنتو
كنتو وين
لما الشوارع ما ثبت قداما مرتق
نفضّت صمت المسافة
مّدت الشوق المضارع
للصباحات التجرتق
كف شهيدا البق مارق
من فرقة الظلمة فجرًا
تم بي دموّ الشرافة وضم حضن الارض عاشق
كنتو وين وين انتو كنتو
لما كان في سجنو ثائر
بي جلابة السونكي نومتو
ويصحى بي امر العساكر
قومتو في الزنزانة يمحى
ويفتح الاف الحناجر
ت.. الاطفال ويكتب انبل الاشعار لباكر
تشطب السجان وصوتو ويبقى فنانا البساسق
كنتو وين . وين انتو كنتو
لما فضل الدين عباية
تربي فوق كتف الغنايا
تنتصب في الجو طوابق
تنقلب في التو بنوكة
للبداهن
والبنافق
والبوافق
لما كان نفس العبايا
تتنفخ بي قدرةحبلا
لي قصار عمر الكحايا
من جُنب تنسلا سيفًا
عبّر السواهو سارق
شدة الفقر الخرافي
حدة الشغل اللي مافي
رُغم الاف المتاجر
والخوازيق والمرافق
كنتو وين انتو كتو
لما البيوت في الشمال قامت خنادق
بالكتابات البتنزل فوق ضهاريهم
مطارق
لما طلاب الحقيقة كانو بختارو المشانق
ولما لسة الله بموت في الجنوب
بين البنادق
كنتو وين وين انتو كنتو
آهـ يا وطني المستف
في المطارات القصية
آه يا كفني المنتف
في مدارات القضية
آهـ يا صمتي المكتف في العبارات الندية
آهي يا نفسي الملطف بالنهارات الصبية
آهـٍ من رفع المصاحف بالرماح الاجنبية
المعاطف اجنبية
العواطف اجنبية
الجلاليب اجنبية
الدولايب اجنبية
الدهاليز اجنبية
السراير اجنبية
المساير اجنبية
صبة الكآس اجنبية
ختت الراس اجنبية
رشة الدلكة اجنبية
رعشة الفركة اجنبية
طفية النور اجنبية
والخوازيق
عربية
عربية
عربية
فضي نارك يا محارب
ولا هات البندقية
غني عشقك يا صبية
احنا قدامك مدارك
غني للوطن المفارق
عشت يا وطني المبرق
بالندى ولون المشارق
يامحرق
يامحرّق
يا مجرب
عشت بي شرف البنادق
ويسقط
العفن ال بتلب فوقنا من شُرف الفنادق
يسقط
يسقط
يسقط
الرجوع الى أعلى الصفحة اذهب الى الأسفل
https://abnajidow.7olm.org
 
كلمات اغاني فرقة عقد الجلاد
الرجوع الى أعلى الصفحة 
صفحة 1 من اصل 1
 مواضيع مماثلة
-
» كلمات اغاني فرقة عقدالجلاد
» كلمات اغاني عقدالجلاد
» مكتبة كلمات خليل فرح
» كلمات أغنية فلق الصباح
» كلمات أغنية علي بابك

صلاحيات هذا المنتدى:لاتستطيع الرد على المواضيع في هذا المنتدى
منتدي ابناء جدو  :: الفئة الأولى :: مـــــجلة القبيلة-
انتقل الى: